ജിസിസി ഡിജിറ്റൽ ഗവൺമെന്റ് അവാർഡ് : മികച്ച സമഗ്ര ഗവൺമെന്റ് ആപ്പ് ഉൾപ്പെടെ രണ്ട് പുരസ്കാരങ്ങളുമായി തിളങ്ങി കുവൈറ്റിന്റെ ‘സഹൽ’ ആപ്പ്

മനാമ/കുവൈറ്റ് സിറ്റി: ബഹ്‌റൈൻ തലസ്ഥാനമായ മനാമയിൽ നടന്ന ഏഴാമത് ജിസിസി ഡിജിറ്റൽ ഗവൺമെന്റ് അവാർഡ് ഉച്ചകോടിയിൽ കുവൈറ്റിന്റെ ഏകീകൃത ഗവൺമെന്റ് സേവന ആപ്പായ ‘സഹൽ’ (Sahel) രണ്ട് പ്രമുഖ പുരസ്കാരങ്ങൾ നേടി. മികച്ച സമഗ്ര ഗവൺമെന്റ് ആപ്പായി (Best Comprehensive Government App) ‘സഹൽ’ തിരഞ്ഞെടുക്കപ്പെട്ടപ്പോൾ, ആപ്പിലെ ‘ന്യൂബോൺ ജേർണി’ (Newborn Journey) സേവനത്തിന് മികച്ച ഗവൺമെന്റ് ഡിജിറ്റൽ സേവന വിഭാഗത്തിൽ മികവിനുള്ള പുരസ്കാരം (Excellence Award) ലഭിച്ചു. ബുധനാഴ്ച വൈകുന്നേരം നടന്ന ചടങ്ങിൽ ബഹ്‌റൈൻ ആഭ്യന്തര മന്ത്രിയും ജിസിസി ഐസിടി മിനിസ്റ്റീരിയൽ കമ്മിറ്റി ചെയർമാനുമായ ലെഫ്റ്റനന്റ് ജനറൽ ഷെയ്ഖ് റാഷിദ് ബിൻ അബ്ദുല്ല അൽ ഖലീഫ, ജിസിസി ജനറൽ സെക്രട്ടറി ജാസിം അൽ ബുദൈവി എന്നിവർ വിജയികൾക്ക് അവാർഡുകൾ സമ്മാനിച്ചു.

കുവൈറ്റിന്റെ ഡിജിറ്റൽ ഗവൺമെന്റ് സേവന മേഖലയിലെ അഭൂതപൂർവ്വമായ പുരോഗതിയുടെ തെളിവാണ് ഈ ഇരട്ട വിജയമെന്ന് വാർത്താവിനിമയ-വിവരസാങ്കേതിക കാര്യ സഹമന്ത്രിയും ഇൻഫർമേഷൻ ആൻഡ് കൾച്ചർ ആക്ടിങ് മന്ത്രിയുമായ ഒമർ അൽ-ഒമർ വ്യാഴാഴ്ച കുവൈറ്റ് ന്യൂസ് ഏജൻസിയോട് (KUNA) പറഞ്ഞു. രാജ്യത്ത് ഡിജിറ്റൽ പരിവർത്തനത്തിന് നൽകുന്ന നിരന്തരമായ പിന്തുണ കണക്കിലെടുത്ത് ഈ നേട്ടം കുവൈറ്റ് അമീർ ഷെയ്ഖ് മിഷാൽ അൽ-അഹമ്മദ് അൽ-ജാബർ അൽ-സബാഹ്, കിരീടാവകാശി ഷെയ്ഖ് സബാഹ് ഖാലിദ് അൽ-ഹമദ് അൽ-സബാഹ്, പ്രധാനമന്ത്രി ഷെയ്ഖ് അഹമ്മദ് അബ്ദുള്ള അൽ-അഹമ്മദ് അൽ-സബാഹ് എന്നിവർക്ക് അദ്ദേഹം സമർപ്പിച്ചു.

വ്യക്തിഗത സേവനങ്ങളിൽ നിന്ന് പൗരന്മാരുടെ ആവശ്യങ്ങൾ മുൻനിർത്തിയുള്ള സംയോജിത ഡിജിറ്റൽ സേവനങ്ങളിലേക്കുള്ള സഹലിന്റെ മാറ്റമാണ് ഈ അംഗീകാരത്തിന് വഴിതെളിച്ചതെന്ന് ഒമർ അൽ-ഒമർ വ്യക്തമാക്കി. നവജാത ശിശുക്കളുടെ വിവരങ്ങൾ രജിസ്റ്റർ ചെയ്യുന്നതിനായുള്ള നടപടിക്രമങ്ങൾ ലളിതമാക്കുന്ന ‘ന്യൂബോൺ ജേർണി’ സേവനം ഏഴ് സർക്കാർ സ്ഥാപനങ്ങളെയാണ് ഏകോപിപ്പിക്കുന്നത്. നീതിന്യായ മന്ത്രാലയം, ആരോഗ്യ മന്ത്രാലയം, ആഭ്യന്തര മന്ത്രാലയം, വാണിജ്യ വ്യവസായ മന്ത്രാലയം, പബ്ലിക് അതോറിറ്റി ഫോർ സിവില്‍ ഇൻഫർമേഷൻ (PACI), പബ്ലിക് അതോറിറ്റി ഫോർ മാൻപവർ (PAM), സിവില്‍ സർവീസ് കമ്മീഷൻ (CSC) എന്നിവയാണ് ഇതിൽ പങ്കാളികളാകുന്നത്. വരുംനാളുകളിൽ നിർമ്മിത ബുദ്ധിയും (AI), മുൻകൂട്ടിയുള്ള സേവനങ്ങളും ഉൾപ്പെടുത്തി സഹൽ കൂടുതൽ ഡിജിറ്റൽ സേവനങ്ങൾ വ്യാപിപ്പിക്കുമെന്നും അദ്ദേഹം കൂട്ടിച്ചേർത്തു.

നിലവിൽ 42 സർക്കാർ സ്ഥാപനങ്ങളുടെ സേവനങ്ങൾ ഒറ്റ പ്ലാറ്റ്‌ഫോമിൽ ലഭ്യമാക്കാൻ സഹലിന് സാധിച്ചിട്ടുണ്ടെന്ന് സഹൽ എക്സിക്യൂട്ടീവ് കമ്മിറ്റി മേധാവി കേണൽ ബഷാർ അൽ-സയ്യിദ് ഹാഷിം അറിയിച്ചു. കുടുംബങ്ങൾക്ക് ഓരോ സർക്കാർ സ്ഥാപനങ്ങളെയും വെവ്വേറെ സമീപിക്കേണ്ട ആവശ്യമില്ലാത്ത രീതിയിലാണ് ‘ന്യൂബോൺ ജേർണി’ രൂപകൽപ്പന ചെയ്തിരിക്കുന്നതെന്ന് കമ്മിറ്റി അംഗം ഫജ്ർ അൽ-യാസീൻ വ്യക്തമാക്കി. വിവിധ വകുപ്പുകൾ തമ്മിലുള്ള സിസ്റ്റം കണക്റ്റിവിറ്റിയും ഡാറ്റ കൈമാറ്റവുമാണ് രേഖകളുടെയും നടപടിക്രമങ്ങളുടെയും ആവർത്തനം ഒഴിവാക്കാൻ സഹായിച്ചതെന്ന് കമ്മിറ്റി അംഗം ആമിന അബ്ദുൽറഹീം ചൂണ്ടിക്കാട്ടി. മുൻപ് അറബ് ഗവൺമെന്റ് എക്‌സലൻസ് അവാർഡിൽ പ്രത്യേക ആദരവ് നേടിയ സഹൽ, 2025-ലെ ഷെയ്ഖ് സേലം അൽ-അലി അൽ-സബാഹ് ഇൻഫോർമാറ്റിക്‌സ് അവാർഡും കരസ്ഥമാക്കിയിരുന്നു.