കുവൈറ്റിൽ സോഷ്യൽ മീഡിയ ഇൻഫ്ലുവൻസർമാർക്കും ഡിജിറ്റൽ പരസ്യങ്ങൾക്കും കർശന നിയന്ത്രണം ; പുതിയ മാധ്യമ നിയമം പ്രാബല്യത്തിൽ

കുവൈറ്റ് സിറ്റി: സോഷ്യൽ മീഡിയ ഇൻഫ്ലുവൻസർമാർ, പരസ്യ ഏജൻസികൾ, ഡിജിറ്റൽ പ്രൊമോട്ടർമാർ, ആർട്ടിഫിഷ്യൽ ഇന്റലിജൻസ് (AI) സാങ്കേതികവിദ്യ ഉപയോഗിച്ച് നിർമ്മിക്കുന്ന ഉള്ളടക്കങ്ങൾ എന്നിവ പൂർണ്ണമായി നിയന്ത്രിക്കുന്ന പുതിയ മാധ്യമ നിയമം കുവൈറ്റിൽ പ്രാബല്യത്തിൽ വന്നു. ഡിജിറ്റൽ രംഗത്തെ വളർച്ചയും പൊതുജനങ്ങളിൽ ഇൻഫ്ലുവൻസർമാരുടെ സ്വാധീനവും കണക്കിലെടുത്ത്, ഉപഭോക്തൃ-കുട്ടികളുടെ അവകാശങ്ങൾ സംരക്ഷിക്കുന്നതിനും സുതാര്യത ഉറപ്പാക്കുന്നതിനുമാണ് ഈ നിയമനിർമ്മാണം.

നിയമത്തിലെ എട്ടാം അധ്യായത്തിലെ 34 മുതൽ 37 വരെയുള്ള ആർട്ടിക്കിളുകൾ ഇൻഫ്ലുവൻസർമാരുടെയും പ്രൊമോട്ടർമാരുടെയും പ്രവർത്തനങ്ങളെ നേരിട്ട് ബാധിക്കുന്നതാണ്. കുവൈറ്റിലെ പ്രേക്ഷകരെ ലക്ഷ്യമിട്ട് പരസ്യങ്ങൾ നൽകുന്ന സ്വദേശികൾ, വിദേശികൾ, സന്ദർശകർ എന്നിവരെല്ലാം ഈ നിയമത്തിന്റെ പരിധിയിൽ വരും. പണം വാങ്ങിയുള്ളതോ അല്ലാത്തതോ ആയ ഡിജിറ്റൽ പ്രചാരണങ്ങൾ, ഉൽപ്പന്ന അവലോകനങ്ങൾ (Reviews), മത്സരങ്ങൾ സംഘടിപ്പിക്കൽ, സമ്മാനങ്ങൾ വിതരണം ചെയ്യൽ എന്നിവയ്ക്ക് ഇനി മുതൽ മന്ത്രാലയത്തിന്റെ മുൻകൂർ ലൈസൻസ് നിർബന്ധമാണ്. രണ്ടുവർഷ കാലാവധിയുള്ള ലൈസൻസിനായുള്ള അപേക്ഷകളിൽ 60 ദിവസത്തിനകം അധികൃതർ തീരുമാനമെടുക്കും.

വ്യക്തിഗത പോസ്റ്റുകളിൽ നിന്നും സ്വതന്ത്രമായ അഭിപ്രായങ്ങളിൽ നിന്നും പരസ്യ ഉള്ളടക്കങ്ങൾ (Promotional Content) വ്യക്തമായി തിരിച്ചറിയുന്ന വിധം അടയാളപ്പെടുത്തണമെന്ന് പുതിയ നിയമം അനുശാസിക്കുന്നു. സ്വകാര്യത ലംഘിക്കുന്ന തരത്തിലോ, അനുമതിയില്ലാതെ വ്യക്തികളുടെ പേരോ ചിത്രമോ ഉപയോഗിച്ചോ ഉള്ള പ്രചാരണങ്ങൾ കുറ്റകരമാണ്. നേരിട്ട് പരസ്യത്തിൽ പ്രത്യക്ഷപ്പെടുന്ന വ്യക്തിക്ക് പുറമെ, പരസ്യത്തിന്റെ സാമ്പത്തിക ലാഭം അനുഭവിക്കുന്ന സ്ഥാപനങ്ങൾക്കും ഇടനിലക്കാർക്കും ഇതിൽ നിയമപരമായ ഉത്തരവാദിത്തം ഉണ്ടായിരിക്കും.

മുൻകൂട്ടിയുള്ള സെൻസർഷിപ്പിന് പകരം, ഉള്ളടക്കം പ്രസിദ്ധീകരിച്ച ശേഷമുള്ള പരിശോധനയും ഉത്തരവാദിത്തവുമാണ് (Post-publication accountability) നിയമം മുന്നോട്ടുവെക്കുന്നത്. നിയമലംഘനം നടത്തുന്നവർക്ക് ഔദ്യോഗിക മുന്നറിയിപ്പ് നൽകാനും, താൽക്കാലികമായി ലൈസൻസ് റദ്ദാക്കാനും അധികൃതർക്ക് അധികാരമുണ്ട്. ഗുരുതരമായ ലംഘനങ്ങൾക്ക് പരസ്യ ലൈസൻസ് ആറ് മാസം വരെ സസ്പെൻഡ് ചെയ്യപ്പെടാം.