എല്ലാ സർക്കാർ ഡിജിറ്റൽ സേവനങ്ങളും ആറു മാസത്തിനകം ‘സഹൽ’ ആപ്പിലേക്ക് മാറ്റാൻ നിർദ്ദേശം നൽകി കുവൈറ്റ് ഭരണകൂടം

കുവൈറ്റ് സിറ്റി: രാജ്യത്തെ മുഴുവൻ സർക്കാർ ഏജൻസികളുടെയും ഡിജിറ്റൽ സേവനങ്ങൾ ആറ് മാസത്തിനകം ‘സഹൽ’ (Sahl) എന്ന ഏകീകൃത സർക്കാർ ആപ്ലിക്കേഷനിലേക്ക് മാറ്റാൻ നിർദേശം നൽകി കുവൈറ്റ് ഭരണകൂടം. സർക്കാർ ഓഫീസുകൾ നേരിട്ട് സന്ദർശിക്കാതെയും നീണ്ട ക്യൂവിൽ നിൽക്കാതെയും സേവനങ്ങൾ വേഗത്തിൽ ലഭ്യമാക്കാൻ പൗരന്മാർക്കും പ്രവാസികൾക്കും സഹൽ ആപ്പ് വഴിയൊരുക്കിയ വൻ വിജയത്തെ തുടർന്നാണ് ഈ നിർണ്ണായക തീരുമാനം .

വിവിധ സർക്കാർ സ്ഥാപനങ്ങളുടെ സേവനങ്ങൾ ഒരു കുടക്കീഴിൽ ലഭ്യമാക്കി ഉപഭോക്തൃ അനുഭവം ഏകീകരിക്കുക, ഡിജിറ്റൽ സംയോജനവും ബന്ധിപ്പിക്കലും ശക്തമാക്കുക, സർക്കാർ സേവനങ്ങളുടെ കാര്യക്ഷമത വർദ്ധിപ്പിക്കുക, പൊതു ചെലവുകൾ യുക്തിസഹമാക്കുക എന്നിവയാണ് ഈ നീക്കത്തിലൂടെ ലക്ഷ്യമിടുന്നത്. പേപ്പർ രഹിത ഇടപാടുകളിലേക്ക് പൂർണ്ണമായി മാറുന്നതിനും ‘കുവൈറ്റ് വിഷൻ 2035’ ലക്ഷ്യങ്ങൾക്ക് അനുസൃതമായി കൂടുതൽ വേഗതയേറിയതും കാര്യക്ഷമവുമായ ഡിജിറ്റൽ ഭരണ മാതൃക കെട്ടിപ്പടുക്കുന്നതിനുമുള്ള വികസന ശ്രമങ്ങളുടെ ഭാഗമായാണ് ഈ നടപടി.

സേവന നടപടിക്രമങ്ങൾ ലഘൂകരിക്കാനും വകുപ്പുകൾ തമ്മിലുള്ള ഏകോപനം മെച്ചപ്പെടുത്താനും സഹൽ ആപ്പിലെ ഡിജിറ്റൽ സർവീസ് യാത്രകൾക്ക് സാധിച്ചിട്ടുണ്ട്. അപേക്ഷകളുടെയും ഇടപാടുകളുടെയും നില തത്സമയം നിരീക്ഷിക്കാനും ട്രാക്ക് ചെയ്യാനും സാധിക്കുന്നത് ഉപഭോക്താക്കളും സർക്കാർ ഏജൻസികളും തമ്മിലുള്ള ബന്ധം കൂടുതൽ സുതാര്യമാക്കി. സേവനങ്ങൾ വിവിധ പ്ലാറ്റ്‌ഫോമുകളിൽ നിന്ന് ഒരു ഏകീകൃത ഡിജിറ്റൽ പ്ലാറ്റ്‌ഫോമിലേക്ക് മാറ്റുന്നതിലൂടെ വ്യത്യസ്ത സർക്കാർ സ്ഥാപനങ്ങൾ കയറിയിറങ്ങേണ്ട സാഹചര്യം പൂർണ്ണമായി ഒഴിവാകുമെന്നും അധികൃതർ വ്യക്തമാക്കി.