ഷാലെറ്റുകളും വിശ്രമകേന്ദ്രങ്ങളും ഉപവാടകയ്ക്ക് നൽകരുതെന്ന് കർശന മുന്നറിയിപ്പുമായി കുവൈറ്റ് ധനമന്ത്രാലയം

കു​വൈ​റ്റ് സി​റ്റി: കുവൈറ്റിൽ ഭരണപരമായ പെർമിറ്റുകളിലൂടെയും കരാറുകളിലൂടെയും അനുവദിച്ചിട്ടുള്ള ഷാലെറ്റുകളും (Chalets) വിശ്രമകേന്ദ്രങ്ങളും (Rest Houses) മറ്റ് മൂന്നാം കക്ഷികൾക്ക് വാടകയ്ക്കോ ഉപവാടകയ്ക്കോ നൽകുന്നതിനെതിരെ ധനമന്ത്രാലയം കർശന മുന്നറിയിപ്പ് നൽകി. മന്ത്രാലയത്തിന് കീഴിലുള്ള സ്റ്റേറ്റ് പ്രോപ്പർട്ടി സെക്ടറാണ് ലൈസൻസ് ഉടമകൾക്കായി പുതിയ നിർദ്ദേശങ്ങൾ പുറപ്പെടുവിച്ചത്.

കരാറുകളിലെയും അഡ്മിനിസ്ട്രേറ്റീവ് പെർമിറ്റുകളിലെയും വ്യവസ്ഥകൾ ലൈസൻസ് ഉടമകൾ പൂർണ്ണമായും പാലിക്കണമെന്ന് അധികൃതർ ആവശ്യപ്പെട്ടു. അനുവദിക്കപ്പെട്ട ഭൂമിയുടെ അതിരുകൾ കൃത്യമായി നിലനിർത്തണമെന്നും, യാതൊരുവിധത്തിലുള്ള കയ്യേറ്റങ്ങളോ ചട്ടലംഘനങ്ങളോ നടത്തരുതെന്നും മന്ത്രാലയം വ്യക്തമാക്കിയിട്ടുണ്ട്. ഇതിന് പുറമെ, മന്ത്രാലയത്തിലേക്ക് അടയ്ക്കാനുള്ള സാമ്പത്തിക ബാധ്യതകളും വാർഷിക ഫീസുകളും കുടിശ്ശിക വരുത്താതെ കൃത്യസമയത്ത് തന്നെ അടച്ചുതീർക്കേണ്ടതുണ്ട്.

കരാർ വ്യവസ്ഥകൾ ലംഘിക്കുകയോ, മന്ത്രാലയത്തോടുള്ള സാമ്പത്തിക ബാധ്യതകൾ നിറവേറ്റുന്നതിൽ പരാജയപ്പെടുകയോ ചെയ്താൽ കർശനമായ നിയമനടപടികൾ നേരിടേണ്ടിവരും. ഇത്തരം സാഹചര്യങ്ങളിൽ യാതൊരുവിധ മുൻകൂട്ടി അറിയിപ്പുകളോ മുന്നറിയിപ്പുകളോ നൽകാതെ തന്നെ ലൈസൻസ് റദ്ദാക്കാനും പ്രസ്തുത ഷാലെറ്റുകളും വിശ്രമകേന്ദ്രങ്ങളും തിരിച്ചുപിടിക്കാനും മന്ത്രാലയത്തിന് പൂർണ്ണ അധികാരമുണ്ടായിരിക്കുമെന്നും അധികൃതർ ഓർമ്മിപ്പിച്ചു.