അനധികൃത പരസ്യങ്ങൾക്കും ലൈസൻസില്ലാത്ത കടകൾക്കുമെതിരെ കർശന നടപടിയുമായി കുവൈറ്റ് മുനിസിപ്പാലിറ്റി

കുവൈറ്റ് സിറ്റി, ജൂൺ 8: രാജ്യത്തെ വാണിജ്യ സ്ഥാപനങ്ങളുടെ ഹെൽത്ത് ലൈസൻസുകളുടെ (ആരോഗ്യ പെർമിറ്റുകൾ) സാധുത ഉറപ്പുവരുത്തുന്നതിനും പരസ്യ നിയമങ്ങൾ പാലിക്കുന്നുണ്ടെന്ന് ഉറപ്പാക്കുന്നതിനുമായി കുവൈറ്റ് മുനിസിപ്പാലിറ്റി രാജ്യവ്യാപകമായി കർശന പരിശോധന ആരംഭിച്ചു. കുവൈറ്റിലെ ആറ് ഗവർണറേറ്റുകളിലും ഒരേസമയം വിപുലമായ ഫീൽഡ് ഇൻസ്പെക്ഷൻ കാമ്പെയ്‌നുകളാണ് അധികൃതർ സംഘടിപ്പിച്ചു വരിക്കുന്നത്.

നഗരങ്ങളുടെയും വാണിജ്യ മേഖലകളുടെയും തനിമയും ഭംഗിയും നിലനിർത്തുക, നഗരങ്ങളുടെ ദൃശ്യഭംഗിക്ക് മങ്ങലേൽപ്പിക്കുന്ന തരത്തിൽ സ്ഥാപിച്ചിട്ടുള്ള അനധികൃത പരസ്യബോർഡുകൾ നീക്കം ചെയ്യുക എന്നിവയാണ് ഈ കാമ്പെയ്‌ന്റെ പ്രധാന ലക്ഷ്യം. ഇതിനായി പ്രത്യേക പരിശോധനാ സംഘങ്ങളെ വിവിധ കടകളിലും വലിയ വാണിജ്യ സമുച്ചയങ്ങളിലും (Commercial Complexes) വിന്യസിച്ചിട്ടുണ്ട്. നിയമലംഘനങ്ങൾ കണ്ടെത്തുന്ന സ്ഥാപനങ്ങൾക്കെതിരെ കർശനമായ നിയന്ത്രണ നടപടികൾ സ്വീകരിക്കുമെന്ന് മുനിസിപ്പാലിറ്റി വക്താക്കൾ അറിയിച്ചു.

ഫർവാനിയ ഗവർണറേറ്റിൽ നടന്ന പരിശോധനകളുടെ വിശദാംശങ്ങൾ എഞ്ചിനീയറിംഗ് ഓഡിറ്റ് ആൻഡ് ഫോളോ-അപ്പ് ഡിപ്പാർട്ട്‌മെന്റ് ഡയറക്ടർ തലാൽ അൽ-അസ്മി പുറത്തുവിട്ടു. ഈ മേഖലയിൽ ആദ്യഘട്ടത്തിൽ 27 കടകളിൽ നടത്തിയ പരിശോധനയിൽ, കടകളുമായും പരസ്യങ്ങളുമായും ബന്ധപ്പെട്ട 3 ഗുരുതരമായ നിയമലംഘനങ്ങൾ കണ്ടെത്തുകയും 7 സ്ഥാപനങ്ങൾക്ക് വീഴ്ചകൾ പരിഹരിക്കുന്നതിനായി മുന്നറിയിപ്പ് (Warning) നൽകുകയും ചെയ്തു. നിയമലംഘനം നടത്തിയവർക്കെതിരെ ആവശ്യമായ എല്ലാ നിയമനടപടികളും സ്വീകരിച്ചിട്ടുണ്ടെന്ന് അദ്ദേഹം വ്യക്തമാക്കി.

വരും ആഴ്ചകളിലും എല്ലാ ഗവർണറേറ്റുകളിലും കൃത്യമായ മുൻഗണനാ ക്രമമനുസരിച്ച് ഫീൽഡ് പരിശോധനകൾ തുടരുമെന്ന് തലാൽ അൽ-അസ്മി പറഞ്ഞു. ബന്ധപ്പെട്ട വിവിധ വകുപ്പുകളുമായി ഏകോപിപ്പിച്ചാണ് ഇതിനുള്ള കർമ്മപദ്ധതി തയ്യാറാക്കിയിരിക്കുന്നത്. കുവൈറ്റിലുടനീളമുള്ള വാണിജ്യ മേഖലകളുടെ പൊതുക്രമം സംരക്ഷിക്കുന്നതിനും നഗരങ്ങളുടെ സൗന്ദര്യം നിലനിർത്തുന്നതിനുമായി മുനിസിപ്പാലിറ്റി നിയമങ്ങൾ കൃത്യമായി നടപ്പാക്കാൻ പ്രതിജ്ഞാബദ്ധമാണെന്ന് അധികൃതർ വീണ്ടും ഓർമ്മിപ്പിച്ചു.