അൽ മുസൈനി എക്സ്ചേഞ്ചിന്റെ ഏറ്റവും പുതിയ ശാഖ മഹബൂലയിൽ പ്രവർത്തനമാരംഭിച്ചു.

കുവൈറ്റ് സിറ്റി: കുവൈറ്റിലെ പ്രമുഖ ധനകാര്യ സ്ഥാപനമായ അൽ മുസൈനി എക്സ്ചേഞ്ചിന്റെ ഏറ്റവും പുതിയ ശാഖ (മഹബൂല 5) അഹമ്മദി ഗവർണറേറ്റിലെ മഹബൂലയിൽ പ്രവർത്തനമാരംഭിച്ചു. ഏപ്രിൽ 2-ന് വ്യാഴാഴ്ച വൈകുന്നേരം 3 മണിയോടെ നടന്ന പ്രൗഢഗംഭീരമായ ചടങ്ങിൽ കമ്പനി ജനറൽ മാനേജർ ശ്രീ. ഹ്യൂ ഫെർണാണ്ടസ് പുതിയ ശാഖയുടെ ഉദ്ഘാടനം നിർവഹിച്ചു.

മഹബൂല ബ്ലോക്ക് 1, 105-ാം നമ്പർ സ്ട്രീറ്റിൽ ബിൽഡിംഗ് നമ്പർ 282/03-ലാണ് അതിനൂതന സൗകര്യങ്ങളോടെ ഈ പുതിയ ശാഖ സജ്ജീകരിച്ചിരിക്കുന്നത്. ഈ മേഖലയിലെ ഉപഭോക്താക്കൾക്ക് കൂടുതൽ വേഗത്തിലും സൗകര്യപ്രദമായും സാമ്പത്തിക സേവനങ്ങൾ ലഭ്യമാക്കുക എന്ന ലക്ഷ്യത്തോടെയാണ് പുതിയ ശാഖ തുറന്നിരിക്കുന്നത്.

ആധുനിക സേവനങ്ങൾ ഒരാഴ്ചയിൽ ഏഴു ദിവസവും

പണമയയ്ക്കൽ (Remittance), വിദേശ നാണയ വിനിമയം, ബിൽ പേയ്‌മെന്റുകൾ തുടങ്ങി നിരവധി സേവനങ്ങൾ ആകർഷകമായ നിരക്കുകളിൽ ആഴ്ചയിൽ ഏഴു ദിവസവും ഇവിടെ ലഭ്യമാകും. തടസ്സരഹിതവും സുരക്ഷിതവുമായ സേവനമാണ് പുതിയ ശാഖയിലൂടെ കമ്പനി ഉറപ്പുനൽകുന്നത്.

“മഹബൂലയിലെ ഞങ്ങളുടെ സാന്നിധ്യം ശക്തിപ്പെടുത്തുന്നതിലും വിശ്വസ്തമായ സാമ്പത്തിക സേവനങ്ങൾ ഈ പ്രദേശത്തെ ജനങ്ങളിലേക്ക് കൂടുതൽ അടുപ്പിക്കുന്നതിലും ഞങ്ങൾ അഭിമാനിക്കുന്നു. കുവൈത്തിലെ ഓരോ ഉപഭോക്താവിനും മികച്ച സേവനവും സൗകര്യവും എളുപ്പത്തിൽ ലഭ്യമാക്കുക എന്നതാണ് അൽ മുസൈനിയുടെ സ്ഥിരമായ ലക്ഷ്യം.” ജനറൽ മാനേജർ ശ്രീ. ഹ്യൂ ഫെർണാണ്ടസ് വ്യക്തമാക്കി

കമ്പനിയിലെ വിവിധ വകുപ്പ് മേധാവികൾ, ഉന്നത ഉദ്യോഗസ്ഥർ, മാധ്യമ പങ്കാളികൾ എന്നിവർ ചടങ്ങിൽ പങ്കെടുത്തു. പ്രധാന താമസ മേഖലകളിലെ ഉപഭോക്താക്കളുടെ മാറിക്കൊണ്ടിരിക്കുന്ന ആവശ്യങ്ങൾ നിറവേറ്റുന്നതിനുള്ള സുപ്രധാന ചുവടുവെപ്പായാണ് ഈ വിപുലീകരണത്തെ ഏവരും വിലയിരുത്തിയത്.

ശാഖാ ശൃംഖല വികസിപ്പിക്കുന്നതിനൊപ്പം, ഡിജിറ്റൽ രംഗത്തും അൽ മുസൈനി മുന്നേറ്റം തുടരുകയാണ്. ഉപഭോക്താക്കൾക്ക് എളുപ്പത്തിൽ ഉപയോഗിക്കാവുന്ന മൊബൈൽ ആപ്ലിക്കേഷനിലൂടെ 24/7 സേവനങ്ങൾ ലഭ്യമാണ്. പുതിയ ഉപഭോക്താക്കൾക്ക് രജിസ്റ്റർ ചെയ്യാനും ഗുണഭോക്താക്കളെ ചേർക്കാനും വെസ്റ്റേൺ യൂണിയൻ, വിസ ഡയറക്ട് എന്നിവ വഴി തൽക്ഷണം പണം അയക്കാനും ആപ്പിലൂടെ സാധിക്കുമെന്നും അധികൃതർ അറിയിച്ചു.