ഫർവാനിയയിൽ കഴിഞ്ഞ ഒരു വർഷത്തിനിടെ നീക്കം ചെയ്തത് അയ്യായിരത്തിലധികം ഉപേക്ഷിക്കപ്പെട്ട വാഹനങ്ങൾ

കുവൈറ്റ് സിറ്റി: ഫർവാനിയ ഗവർണറേറ്റിലെ വിവിധ ഭാഗങ്ങളിൽ നിന്ന് കഴിഞ്ഞ ഒരു വർഷത്തിനിടെ 5,122 ഉപേക്ഷിക്കപ്പെട്ട വാഹനങ്ങൾ മുനിസിപ്പാലിറ്റി അധികൃതർ നീക്കം ചെയ്തു. ഫർവാനിയ മുനിസിപ്പാലിറ്റി ബ്രാഞ്ചിലെ പബ്ലിക് ഹൈജീൻ ആൻഡ് റോഡ് ഒക്യുപ്പൻസി ഡിപ്പാർട്ട്‌മെൻ്റാണ് ഈ നടപടിക്ക് നേതൃത്വം നൽകിയത്. പൊതുസ്ഥലങ്ങളിലും റോഡുകളിലും തടസ്സമായി കിടന്നിരുന്ന വാഹനങ്ങളാണ് പിടിച്ചെടുത്ത് മുനിസിപ്പാലിറ്റിയുടെ ഇമ്പൗണ്ട് ലോട്ട് കേന്ദ്രങ്ങളിലേക്ക് മാറ്റിയത്.

റോഡുകൾ കൈയേറുന്നതും വൃത്തിഹീനമായ രീതിയിൽ വാഹനങ്ങൾ ഉപേക്ഷിക്കുന്നതും തടയുന്നതിനായി 24 മണിക്കൂറും പരിശോധനകൾ നടന്നുവരികയാണെന്ന് പബ്ലിക് ഹൈജീൻ വിഭാഗം ഡയറക്ടർ മുഹമ്മദ് അൽ ജാബ അറിയിച്ചു. രാജ്യത്തെ പൊതു ശുചിത്വ-റോഡ് നിയമങ്ങൾ കർശനമായി നടപ്പിലാക്കുകയാണ് ഇതിലൂടെ ലക്ഷ്യമിടുന്നത്.

നടപടികൾ ഇങ്ങനെ: വാഹനങ്ങൾ നീക്കം ചെയ്യുന്നതിന് മുന്നോടിയായി ഉടമകൾക്ക് മുന്നറിയിപ്പ് നൽകുന്നതിനായി 18,463 സ്റ്റിക്കറുകൾ വിവിധ വാഹനങ്ങളിലായി പതിപ്പിച്ചു. കൂടാതെ 3,753 പേരിൽ നിന്ന് സത്യവാങ്മൂലം വാങ്ങുകയും 4,094 പേർക്ക് കർശന മുന്നറിയിപ്പ് നൽകുകയും ചെയ്തിട്ടുണ്ട്. നിയമപരമായ നടപടികൾ പൂർത്തിയാക്കിയ 3,312 വാഹനങ്ങൾ ഇതിനോടകം ഉടമകൾക്ക് വിട്ടുനൽകി.

പിഴയും മറ്റ് ലംഘനങ്ങളും: പരിശോധനയുടെ ഭാഗമായി ആകെ 5,557 നിയമലംഘനങ്ങൾ റിപ്പോർട്ട് ചെയ്തു. ഇതിൽ പ്രധാനമായും ഉൾപ്പെടുന്നത്:

• തെരുവ് കച്ചവടക്കാർക്കെതിരെയുള്ള നടപടികൾ: 1,041
• റോഡ് തടസ്സപ്പെടുത്തിയതിന്: 771
• പൊതു ശുചിത്വ നിയമലംഘനങ്ങൾ: 3,686

ഇതുകൂടാതെ 127 പുതിയ ലൈസൻസുകൾ അനുവദിക്കുകയും 132 ലൈസൻസുകൾ പുതുക്കി നൽകുകയും ചെയ്തിട്ടുണ്ട്. ഗവർണറേറ്റിലെ എല്ലാ മേഖലകളിലും പരിശോധന തുടരുമെന്നും, ഉപേക്ഷിക്കപ്പെട്ട നിലയിൽ വാഹനങ്ങൾ കാണപ്പെട്ടാൽ ഉടമകൾ നിശ്ചിത സമയത്തിനകം അത് നീക്കം ചെയ്യണമെന്നും അധികൃതർ അറിയിച്ചു. അല്ലാത്തപക്ഷം പിഴയും മറ്റ് നിയമനടപടികളും നേരിടേണ്ടി വരുമെന്ന് മുനിസിപ്പാലിറ്റി മുന്നറിയിപ്പ് നൽകി.