കുവൈറ്റ് തണുത്ത് വിറക്കുന്നു : കുറഞ്ഞ താപനില മൈനസ് മൂന്ന് (-3) ഡിഗ്രി രേഖപ്പെടുത്തി.

കുവൈറ്റിൽ അതിശൈത്യം തുടരുന്നു , പകൽ ചെറിയ തണുപ്പും രാത്രി അതിശൈത്യവും തുടരുമെന്ന് കാലാവസ്ഥാ വകുപ്പ് പ്രവചിച്ചു . അടുത്ത വ്യാഴാഴ്ച വരെ കാർഷിക മേഖലയിലും മരുഭൂമിയിലും മഞ്ഞ് പ്രതീക്ഷിക്കാം. തണുത്തതും വരണ്ടതുമായ കാലാവസ്ഥ രാജ്യത്ത് തുടരുമെന്ന് കാലാവസ്ഥാ വകുപ്പ് ഡയറക്ടർ ധാരാർ അൽ-അലി കുവൈറ്റ് വാർത്താ ഏജൻസിയായ (കുന)യോട് സ്ഥിരീകരിച്ചു

സാൽമി പ്രദേശത്തെ കാലാവസ്ഥാ നിരീക്ഷണ കേന്ദ്ര സ്റ്റേഷനിൽ പൂജ്യത്തിന് താഴെ മൂന്ന് ഡിഗ്രി സെൽഷ്യസും അബ്ദാലിയിൽ രണ്ട് ഡിഗ്രി സെൽഷ്യസും കുവൈറ്റ് അന്താരാഷ്ട്ര വിമാനത്താവളത്തിൽ ആറ് ഡിഗ്രി സെൽഷ്യസും രേഖപ്പെടുത്തിയതായി അൽ-അലി റിപ്പോർട്ട് ചെയ്തു . വ്യാഴാഴ്ച വരെ ചില പ്രദേശങ്ങളിൽ മഞ്ഞ് രൂപപ്പെടാൻ സാധ്യതയുണ്ട്. എന്നിരുന്നാലും, വെള്ളിയാഴ്ച വൈകുന്നേരം മുതൽ രാജ്യത്ത് ഉയർന്ന മർദ്ധം കുറയാൻ തുടങ്ങുമെന്നും വെള്ളിയാഴ്ച ചില സ്ഥലങ്ങളിൽ ചെറിയ രീതിയിലുള്ള ചാറ്റൽ മഴ പ്രതീക്ഷിക്കുന്നതായും അൽ-അലി അഭിപ്രായപ്പെട്ടു.

അതെ സമയം രാജ്യത്ത് അനുഭവപ്പെടുന്ന അസ്ഥിര കാലാവസ്ഥയെ തുടർന്ന് പൊതു ജനങ്ങൾ ജാഗ്രത പാലിക്കണമെന്ന് അധികൃതർ മുന്നറിയിപ്പ് നൽകി. അത്യാവശ്യ കാര്യങ്ങൾക്ക് ഒഴികെ പുറത്ത് പോകുന്നത് ഒഴിവാക്കണമെന്നും അധികൃതർ പൊതു ജനങ്ങളോട് ആവശ്യപ്പെട്ടു.