സുരക്ഷാ സാഹചര്യം ; റിയാദ് വിമാനത്താവളം താൽക്കാലികമായി അടച്ചതിനെത്തുടർന്ന് സർവീസുകൾ റദ്ദാക്കി കുവൈറ്റ് എയർവേയ്‌സ്

കുവൈറ്റ് സിറ്റി: നിലവിലുള്ള സുരക്ഷാ സാഹചര്യങ്ങളെ തുടർന്ന് റിയാദ് വിമാനത്താവളം താൽക്കാലികമായി അടച്ചുപൂട്ടിയതിനെത്തുടർന്ന് റിയാദിലേക്കും തിരിച്ചുമുള്ള വിമാന സർവീസുകൾ കുവൈറ്റ് എയർവേയ്‌സ് റദ്ദാക്കി. ഒക്ടോബർ 10, 2026 ശനിയാഴ്ച കുവൈറ്റിൽ നിന്ന് റിയാദിലേക്കുള്ള കെ.യു. 775 (KU775), റിയാദിൽ നിന്ന് കുവൈറ്റിലേക്കുള്ള കെ.യു. 776 (KU776) എന്നീ വിമാന സർവീസുകളാണ് റദ്ദാക്കിയത്.

യാത്രക്കാർ തങ്ങളുടെ വിമാനങ്ങളുടെ സ്റ്റാറ്റസ് കൃത്യസമയത്ത് പരിശോധിക്കണമെന്ന് എയർലൈൻ അധികൃതർ കർശന നിർദ്ദേശം നൽകിയിട്ടുണ്ട്. ടിക്കറ്റ് ബുക്ക് ചെയ്യുമ്പോൾ നൽകിയിട്ടുള്ള മൊബൈൽ നമ്പറുകളിലേക്ക് എയർലൈൻ അധികൃതർ സന്ദേശങ്ങളും അറിയിപ്പുകളും അയക്കുന്നുണ്ട്.

കൂടുതൽ വിവരങ്ങൾക്കും ഏറ്റവും പുതിയ അപ്‌ഡേറ്റുകൾക്കുമായി യാത്രക്കാർ കുവൈറ്റ് എയർവേയ്‌സിന്റെ ഔദ്യോഗിക ആശയവിനിമയ ചാനലുകൾ പരിശോധിക്കണമെന്നും അധികൃതർ അഭ്യർത്ഥിച്ചു.