വ്യക്തിഗത സ്പോൺസർഷിപ്പ് വിസ ( ആർട്ടിക്കിൾ 7 ) വിഭാഗക്കാർക്ക് സിവിൽ സ്റ്റാറ്റസ് പുതുക്കാൻ ഡിജിറ്റൽ സേവനവുമായി കുവൈറ്റ് പബ്ലിക് അതോറിറ്റി ഫോർ സിവിൽ ഇൻഫർമേഷൻ

കുവൈത്ത് സിറ്റി: ആർട്ടിക്കിൾ 7 ബിസ് (വ്യക്തിഗത / സ്വയം സ്പോൺസർഷിപ്പ്) വിസ പരിധിയിൽ വരുന്ന വ്യക്തികൾക്ക് തങ്ങളുടെ സിവിൽ സ്റ്റാറ്റസ് മാറ്റുന്നതിനായി പുതിയ ഡിജിറ്റൽ സേവനം ആരംഭിച്ച് കുവൈത്ത് പബ്ലിക് അതോറിറ്റി ഫോർ സിവിൽ ഇൻഫർമേഷൻ (PACI). അപേക്ഷകർക്ക് ഇനി മുതൽ പി.എ.സി.ഐ ഓഫീസുകളിൽ നേരിട്ടെത്താതെ തന്നെ ഓൺലൈൻ മാർഗ്ഗങ്ങളിലൂടെ നടപടികൾ ലളിതമായി പൂർത്തിയാക്കാൻ സാധിക്കും.

ഏകീകൃത സർക്കാർ സേവന ആപ്ലിക്കേഷനായ ‘സഹൽ’ (Sahel) വഴിയോ അല്ലെങ്കിൽ പി.എ.സി.ഐയുടെ ഔദ്യോഗിക വെബ്സൈറ്റ് വഴിയോ സിവിൽ സ്റ്റാറ്റസ് തിരുത്തുന്നതിനുള്ള അപേക്ഷകൾ സമർപ്പിക്കാവുന്നതാണ്. ഓഫീസ് സന്ദർശനം പൂർണ്ണമായും ഒഴിവാക്കിയത് പ്രവാസികൾക്ക് ഏറെ ആശ്വാസകരമാകും.

ആർട്ടിക്കിൾ 7 ബിസ് വിസയിലുള്ളവരുടെ നടപടിക്രമങ്ങൾ വേഗത്തിലാക്കാനും സുതാര്യമാക്കാനുമാണ് ഈ ഇലക്ട്രോണിക് സംവിധാനം നടപ്പിലാക്കിയതെന്ന് അതോറിറ്റി വ്യക്തമാക്കി. രാജ്യത്തെ ഡിജിറ്റൽ ഭരണസംവിധാനം കൂടുതൽ ശക്തിപ്പെടുത്തുന്നതിന്റെ ഭാഗമായാണ് പുതിയ നീക്കം.