കുവൈറ്റിൽ അനധികൃതമായി ഉത്തേജക മരുന്നുകളും ഫുഡ് സപ്ലിമെന്റുകളും നിർമ്മിച്ച് വിതരണം ചെയ്ത രണ്ട് ഏഷ്യൻ വംശജർ പിടിയിൽ

കുവൈറ്റ്‌ സിറ്റി: അനധികൃതമായി ലൈംഗിക ഉത്തേജക മരുന്നുകളും വിവിധ ഫുഡ് സപ്ലിമെന്റുകളും നിർമ്മിക്കുകയും സോഷ്യൽ മീഡിയ വഴി വിൽപന നടത്തുകയും ചെയ്ത രണ്ട് ഏഷ്യൻ വംശജരെ കുവൈറ്റ് ക്രിമിനൽ സെക്യൂരിറ്റി വിഭാഗം (ജഹ്റ ഇൻവെസ്റ്റിഗേഷൻ ഡിപ്പാർട്ട്മെന്റ്) അറസ്റ്റ് ചെയ്തു. സിറിയൻ, ഇന്ത്യൻ സ്വദേശികളാണ് സംഭവത്തിൽ പിടിയിലായത്.

സോഷ്യൽ മീഡിയ പ്ലാറ്റ്‌ഫോമുകൾ വഴി അനധികൃതമായി ഇത്തരം ഉൽപ്പന്നങ്ങൾ പ്രചരിപ്പിക്കുകയും ലൈസൻസില്ലാതെ ആവശ്യക്കാർക്ക് എത്തിച്ചുനൽകുകയും ചെയ്യുന്നുണ്ടെന്ന രഹസ്യ വിവരത്തിന്റെ അടിസ്ഥാനത്തിലായിരുന്നു ആദ്യ പരിശോധന. ‘അൽ മുത്‌ലാ’ (Al-Mutlaa) റെസിഡൻഷ്യൽ ഏരിയയിൽ വെച്ച് പിടിയിലായ ഒന്നാം പ്രതിയിൽ നിന്ന് വലിയ അളവിൽ വ്യാജ ഉൽപ്പന്നങ്ങളും വിൽപനയിലൂടെ ലഭിച്ച 82 കുവൈറ്റി ദിനാറും പൊലീസ് കണ്ടെടുക്കുകയുണ്ടായി. ഇയാളെ ചോദ്യം ചെയ്തപ്പോഴാണ് ഉൽപ്പന്നങ്ങൾ വിതരണം ചെയ്ത രണ്ടാമത്തെ പ്രതിയെക്കുറിച്ച് വിവരങ്ങൾ ലഭിച്ചത്.

തുടർന്ന് നടത്തിയ തിരച്ചിലിൽ രണ്ടാമത്തെ പ്രതിയെ ‘ഫർവാനിയ’ (Farwaniya) പ്രദേശത്തുനിന്നും സുരക്ഷാസേന പിടികൂടി. ഇയാൾ തന്റെ താമസസ്ഥലത്ത് വെച്ച് വിവിധ ഗുളികകൾ പൊടിച്ചും മറ്റ് ചേരുവകൾ കലർത്തിയും അനധികൃതമായി ഇത്തരം മരുന്നുകൾ നിർമ്മിച്ച് വിൽപനയ്ക്കായി പാക്ക് ചെയ്തു വരികയായിരുന്നു. ഇയാളുടെ താമസസ്ഥലത്തുനിന്നും 151 കാർട്ടൺ ഉത്തേജക മരുന്നുകളും വിൽപനയിലൂടെ സമാഹരിച്ച 226 കുവൈറ്റി ദിനാറും കസ്റ്റഡിയിലെടുത്തു. അറസ്റ്റിലായ പ്രതികൾക്കെതിരെ നിയമനടപടികൾ സ്വീകരിച്ച് തുടർനടപടികൾക്കായി ബന്ധപ്പെട്ട അതോറിറ്റിക്ക് കൈമാറി.