കള്ളപ്പണം വെളുപ്പിക്കൽ തടയാൻ കർശന നടപടി; സംശയാസ്പദമായ ഇടപാടുകാരുടെ അക്കൗണ്ടുകൾ നിരീക്ഷിക്കാൻ കുവൈത്ത് സെൻട്രൽ ബാങ്ക് നിർദ്ദേശം

കുവൈത്ത് സിറ്റി: രാജ്യത്തെ സാമ്പത്തിക മേഖലയുടെ സുരക്ഷ വർദ്ധിപ്പിക്കുന്നതിന്റെ ഭാഗമായി, സംശയാസ്പദമായ രീതിയിൽ ബാങ്ക് ഇടപാടുകൾ നടത്തുന്ന വ്യക്തികളെയും സ്ഥാപനങ്ങളെയും നിരീക്ഷിക്കാൻ പ്രാദേശിക ബാങ്കുകൾക്ക് കുവൈത്ത് സെൻട്രൽ ബാങ്ക് (CBK) കർശന നിർദ്ദേശം നൽകി. കള്ളപ്പണം വെളുപ്പിക്കൽ (Money Laundering), തീവ്രവാദ പ്രവർത്തനങ്ങൾക്കുള്ള ധനസഹായം എന്നിവ തടയുന്നതിനുള്ള അന്താരാഷ്ട്ര മാനദണ്ഡങ്ങൾ പാലിക്കുന്നതിന്റെ ഭാഗമായാണ് ഈ നടപടി.

നിരീക്ഷണത്തിലുള്ള ഇടപാടുകാരിൽ നിന്ന് കൃത്യമായ ഇടവേളകളിൽ കൂടുതൽ വിവരങ്ങളും രേഖകളും ബാങ്കുകൾ ആവശ്യപ്പെടണം. നിശ്ചിത സമയപരിധിക്കുള്ളിൽ ഇടപാടുകളുടെ നിയമസാധുത തെളിയിക്കുന്ന രേഖകൾ ഹാജരാക്കാൻ ഇടപാടുകാർക്ക് ബാങ്കുകൾ അവസരം നൽകും. എന്നാൽ, മതിയായ രേഖകൾ സമർപ്പിക്കാത്തവരുടെ അക്കൗണ്ടുകൾ ഉടൻ റദ്ദാക്കാനാണ് സെൻട്രൽ ബാങ്കിന്റെ നിർദ്ദേശം.

ഇടപാടുകാരുടെ അക്കൗണ്ടുകൾ മരവിപ്പിക്കുകയോ റദ്ദാക്കുകയോ ചെയ്യുമ്പോൾ അതിന്റെ യഥാർത്ഥ കാരണം വെളിപ്പെടുത്താൻ പാടില്ലെന്ന പ്രത്യേക നിർദ്ദേശവും ബാങ്കുകൾക്ക് നൽകിയിട്ടുണ്ട്. അക്കൗണ്ട് ക്ലോസ് ചെയ്യുന്നത് കള്ളപ്പണം വെളുപ്പിക്കൽ സംശയത്തിന്റെ പേരിലാണെന്ന് ഇടപാടുകാരെ അറിയിക്കരുത്. പകരം, അക്കൗണ്ട് തുറക്കുന്ന സമയത്ത് ഒപ്പിട്ട കരാറിലെ വ്യവസ്ഥകൾ പ്രകാരം ബാങ്കിന് അക്കൗണ്ട് റദ്ദാക്കാനുള്ള അധികാരം ഉപയോഗിച്ചാണ് നടപടിയെന്ന് അറിയിച്ചാൽ മതിയാകും. ഇത് അന്വേഷണത്തിന്റെ രഹസ്യസ്വഭാവം നിലനിർത്താനാണ്.

സമാനമായ രീതിയിൽ വീണ്ടും സാമ്പത്തിക ക്രമക്കേടുകൾ ആവർത്തിക്കുന്നത് ഒഴിവാക്കാനാണ് ബാങ്കിംഗ് ബന്ധം വിച്ഛേദിക്കാൻ ആവശ്യപ്പെടുന്നത്. ഇത്തരത്തിൽ ഫിനാൻഷ്യൽ ഇൻ്റലിജൻസ് യൂണിറ്റിന് (FIU) റിപ്പോർട്ട് ചെയ്ത ശേഷവും അക്കൗണ്ട് തുടരാൻ അനുവദിക്കുന്നത് ബാങ്കുകളെ നിയമപരമായ ബാധ്യതകളിലേക്ക് നയിക്കുമെന്നതിനാലാണ് നടപടി കർശനമാക്കുന്നത്.

2023 ഫെബ്രുവരി 16-ന് പുറത്തിറക്കിയ കള്ളപ്പണം വെളുപ്പിക്കൽ വിരുദ്ധ ചട്ടങ്ങളിലെ 14-ാം വകുപ്പ് പ്രകാരമാണ് പുതിയ നിർദ്ദേശങ്ങൾ. കുവൈത്തിന്റെ സാമ്പത്തിക അടിത്തറ കൂടുതൽ ഭദ്രമാക്കാനും സാമ്പത്തിക കുറ്റകൃത്യങ്ങൾക്കെതിരെയുള്ള ആഗോള പോരാട്ടത്തിൽ രാജ്യത്തിന്റെ സ്ഥാനം ഉറപ്പിക്കാനും ഈ നീക്കം സഹായകരമാകുമെന്ന് അധികൃതർ അറിയിച്ചു.