കനത്ത മഴ മുന്നറിയിപ്പിനെ തുടർന്ന് കുവൈറ്റിലെ പൊതു-സ്വകാര്യ സ്കൂളുകൾക്ക് വ്യാഴാഴ്ച (11/12/25) അവധി പ്രഖ്യാപിച്ച്‌ വിദ്യാഭ്യാസ മന്ത്രാലയം

കുവൈറ്റ് സിറ്റി: രാജ്യത്ത് കനത്ത മഴയ്ക്കും ഇടിമിന്നലിനും സാധ്യതയുണ്ടെന്ന മുന്നറിയിപ്പുകൾ കണക്കിലെടുത്ത് കുവൈറ്റിലെ എല്ലാ പൊതു-സ്വകാര്യ സ്കൂളുകൾക്കും വിദ്യാഭ്യാസ മന്ത്രാലയം വ്യാഴാഴ്ച അവധി പ്രഖ്യാപിച്ചു. വിദ്യാർത്ഥികൾ, അധ്യാപകർ, ജീവനക്കാർ എന്നിവരുടെ സുരക്ഷ ഉറപ്പാക്കുന്നതിനുള്ള അടിയന്തര മുൻകരുതൽ നടപടിയായാണ് ക്ലാസുകൾ നിർത്തിവെക്കാൻ മന്ത്രാലയം തീരുമാനിച്ചത്.

സിവിൽ ഏവിയേഷൻ ജനറൽ അഡ്മിനിസ്‌ട്രേഷന് (DGCA) കീഴിലുള്ള കാലാവസ്ഥാ നിരീക്ഷണ വിഭാഗം പുറത്തിറക്കിയ മുന്നറിയിപ്പുകളുടെ അടിസ്ഥാനത്തിലാണ് ഈ സുപ്രധാന തീരുമാനം കൈക്കൊണ്ടതെന്ന് വിദ്യാഭ്യാസ മന്ത്രാലയം വക്താവ് അറിയിച്ചു. മഴയെത്തുടർന്നുണ്ടാകാനിടയുള്ള യാത്രാ തടസ്സങ്ങളും മറ്റ് അപകടസാധ്യതകളും ഒഴിവാക്കുകയാണ് ലക്ഷ്യം.

അസ്ഥിരമായ കാലാവസ്ഥയുമായി ബന്ധപ്പെട്ട് വിദ്യാഭ്യാസ സ്ഥാപനങ്ങൾ സ്വീകരിക്കേണ്ട നടപടികളെക്കുറിച്ച് മന്ത്രാലയം നേരത്തെ തന്നെ നിർദ്ദേശങ്ങൾ നൽകിയിട്ടുണ്ട്. ഔദ്യോഗിക അറിയിപ്പുകൾക്കായി മന്ത്രാലയത്തിന്റെ വെബ്സൈറ്റുകളും സോഷ്യൽ മീഡിയ പ്ലാറ്റ്‌ഫോമുകളും ശ്രദ്ധിക്കണമെന്ന് അധികൃതർ പൊതുജനങ്ങളോട് അഭ്യർത്ഥിച്ചു.