കുവൈറ്റിൽ വാരാന്ത്യത്തോടെ ശൈത്യകാലം ആരംഭിക്കുമെന്ന് കാലാവസ്ഥാ നിരീക്ഷണ കേന്ദ്രം

കുവൈറ്റ് സിറ്റി:

കുവൈറ്റിൽ ഔദ്യോഗികമായി ശൈത്യകാലത്തിന് തുടക്കം കുറിക്കുന്ന ‘അൽ മുറബ്ബാനിയ്യ’ (Al-Murabba’aniyah) സീസൺ ഡിസംബർ 6-ന് ആരംഭിക്കുമെന്ന് അൽ ഒജൈരി സയന്റിഫിക് സെന്റർ അറിയിച്ചു.

39 ദിവസമാണ് ഈ സീസണിന്റെ ദൈർഘ്യം. ആദ്യ ദിവസങ്ങളിൽ താപനിലയിൽ കാര്യമായ കുറവ് അനുഭവപ്പെട്ടില്ലെങ്കിലും, ചൂടിൽ നിന്ന് തണുപ്പിലേക്ക് രാജ്യം ക്രമേണ മാറുന്നതിന്റെ സൂചനയായാണ് ഈ കാലഘട്ടത്തെ കണക്കാക്കുന്നത്. ‘അൽ വസാം’ സീസൺ അവസാനിക്കുന്നതിന് തൊട്ടുപിന്നാലെയാണ് അൽ മുറബ്ബാനിയ്യ ആരംഭിക്കുന്നത്.

സീസണിന്റെ തുടക്കത്തിൽ താപനിലയിൽ ഏറ്റക്കുറച്ചിലുകൾ ഉണ്ടാകുമെങ്കിലും, ദിവസങ്ങൾ കഴിയുന്തോറും തണുപ്പ് സ്ഥിരമായി ശക്തിപ്രാപിക്കും. അൽ ഇക്‌ലിൽ, അൽ ഖൽബ്, അൽ ശുല എന്നിങ്ങനെ 13 ദിവസം വീതമുള്ള മൂന്ന് ഘട്ടങ്ങളായാണ് അൽ മുറബ്ബാനിയ്യ സീസൺ തരംതിരിച്ചിരിക്കുന്നത്.

ഈ കാലയളവിൽ രാത്രികൾക്ക് ദൈർഘ്യം കൂടുകയും ചെയ്യും. ഡിസംബർ 21-ന് വർഷത്തിലെ ഏറ്റവും ദൈർഘ്യമേറിയ രാത്രി (13 മണിക്കൂറും 44 മിനിറ്റും) അനുഭവപ്പെടും. ഇത് ശൈത്യകാലത്തിന്റെ പ്രതീതിയും തീവ്രതയും വർദ്ധിപ്പിക്കുമെന്ന് അൽ ഒജൈരി സയന്റിഫിക് സെന്റർ വ്യക്തമാക്കി.