കുവൈത്ത് സ്കൂളുകളിൽ മതപരവും രാഷ്ട്രീയപരവുമായ പ്രവർത്തനങ്ങൾക്ക് വിലക്ക്; പുതിയ സർക്കുലർ പുറത്തിറക്കി

---

കുവൈറ്റ് സിറ്റി: – കുവൈറ്റിലെ സ്കൂളുകളിൽ മതപരവും രാഷ്ട്രീയപരവുമായ തീവ്രവാദത്തെ പ്രോത്സാഹിപ്പിക്കുന്നതോ വിഭാഗീയതയും പക്ഷപാതപരവുമായ ആശയങ്ങൾ വളർത്തുന്നതോ ആയ എല്ലാ പ്രവർത്തനങ്ങൾക്കും വിദ്യാഭാസ മന്ത്രാലയം കർശന വിലക്കേർപ്പെടുത്തി. വിദ്യാഭ്യാസകാര്യ അസിസ്റ്റന്റ് അണ്ടർസെക്രട്ടറി എൻജിനീയർ ഹമദ് അൽ-ഹമദ് ഇത് സംബന്ധിച്ച സർക്കുലർ പുറത്തിറക്കി.

വിദ്യാഭ്യാസ സ്ഥാപനങ്ങളിൽ നിഷ്പക്ഷവും എല്ലാവരെയും ഉൾക്കൊള്ളുന്നതുമായ അക്കാദമിക അന്തരീക്ഷം നിലനിർത്തുന്നതിനും വിദ്യാർത്ഥികളിൽ ദേശീയ ഐക്യവും കൂറും വളർത്തുന്നതിനും വേണ്ടിയാണ് പുതിയ മാർഗ്ഗനിർദ്ദേശങ്ങൾ.

കർശനമായ നിർദ്ദേശങ്ങൾ

പ്രഭാത അസംബ്ലി, സ്കൂൾ പ്രവർത്തനങ്ങൾ എന്നിവ ലക്ഷ്യമിടുന്ന വിദ്യാഭ്യാസപരമായ ഉദ്ദേശ്യങ്ങൾ കൈവരിക്കുന്നുണ്ടെന്ന് ഉറപ്പാക്കാൻ സ്കൂൾ അധികൃതർ പാലിക്കേണ്ട പ്രത്യേക നടപടികൾ സർക്കുലറിൽ നിഷ്കർഷിക്കുന്നു:

• മതപരമോ രാഷ്ട്രീയപരമോ ആയ തീവ്രവാദത്തിന് പ്രോത്സാഹനം നൽകുന്നതോ വിഭാഗീയമോ പക്ഷപാതപരമോ ആയ ആശയങ്ങളെ പിന്തുണയ്ക്കുന്നതോ ആയ എല്ലാ മത്സരങ്ങളും പരിപാടികളും പ്രവർത്തനങ്ങളും പൂർണ്ണമായി നിരോധിച്ചു.
• വിദ്യാർത്ഥികളിൽ അച്ചടക്കം, രാജ്യസ്നേഹം, മാനസികവും ശാരീരികവുമായ സന്നദ്ധത, സാമൂഹിക ബന്ധങ്ങൾ എന്നിവ ശക്തിപ്പെടുത്തുന്നതിൽ പ്രഭാത അസംബ്ലിക്ക് സുപ്രധാന പങ്കുണ്ട്. അതിനാൽ, വൈകി വരുന്നവർ ഉൾപ്പെടെയുള്ള എല്ലാ വിദ്യാർത്ഥികളുടെയും പ്രഭാത അസംബ്ലിയിലെ പങ്കാളിത്തം നിർബന്ധമാക്കി.
• പഠന പ്രക്രിയയെ മെച്ചപ്പെടുത്തുന്നതിനും വിദ്യാർത്ഥികളുടെ കഴിവുകളെയും ശേഷികളെയും പരിപോഷിപ്പിക്കുന്നതിനും ഊന്നൽ നൽകുന്ന വിദ്യാഭ്യാസപരവും സാംസ്കാരികപരവുമായ പരിപാടികൾ സംഘടിപ്പിക്കണം.
• ഔദ്യോഗിക പരിപാടികളിൽ വിദേശ രാജ്യങ്ങളുടെ പതാക ഉയർത്തുന്നതോ ദേശീയഗാനം ആലപിക്കുന്നതോ വിലക്കുന്ന 2024-ലെ കാബിനറ്റ് റെസലൂഷൻ നമ്പർ 691 ഉൾപ്പെടെയുള്ള സർക്കാർ ഉത്തരവുകൾ പാലിക്കണം. സ്കൂളുകളിലെ ആഘോഷ പരിപാടികൾ സംബന്ധിച്ച 2025-ലെ മന്ത്രിതല റെസലൂഷൻ നമ്പർ 135-ഉം കർശനമായി നടപ്പാക്കണം.

ഈ മാർഗ്ഗനിർദ്ദേശങ്ങൾ വിദ്യാർത്ഥികൾക്കിടയിൽ ദേശീയ കൂറും ഐക്യബോധവും വളർത്തുന്ന ഒരു സമഗ്ര വിദ്യാഭ്യാസ അന്തരീക്ഷം സ്കൂളുകളിൽ നിലനിർത്താൻ ലക്ഷ്യമിട്ടുള്ളതാണെന്ന് അൽ-ഹമദ് വ്യക്തമാക്കി.