കുവൈറ്റിൽ ഇന്ത്യൻ മാമ്പഴ, കാർഷിക ഉൽപ്പന്ന പ്രദർശനം സംഘടിപ്പിച്ചു; ഇന്ത്യയും കുവൈറ്റും തമ്മിലുള്ള വ്യാപാര ബന്ധം ശക്തിപ്പെടുത്തുക ലക്ഷ്യം

കുവൈറ്റ് സിറ്റി: ഇന്ത്യയും കുവൈറ്റും തമ്മിലുള്ള വ്യാപാര ബന്ധം, പ്രത്യേകിച്ച് കാർഷിക-ഭക്ഷ്യ രംഗത്ത്, കൂടുതൽ ശക്തിപ്പെടുത്തുന്നതിന്റെ ഭാഗമായി കുവൈറ്റിലെ ഇന്ത്യൻ എംബസി, അഗ്രികൾച്ചറൽ ആൻഡ് പ്രോസസ്ഡ് ഫുഡ് പ്രൊഡക്ട്സ് എക്സ്പോർട്ട് ഡെവലപ്‌മെൻ്റ് അതോറിറ്റി (APEDA), കുവൈറ്റ് ചേംബർ ഓഫ് കൊമേഴ്‌സ് ആൻഡ് ഇൻഡസ്ട്രി (KCCI) എന്നിവയുമായി സഹകരിച്ച് ഇന്ത്യൻ മാമ്പഴ, പഴം, കാർഷിക ഉൽപ്പന്നങ്ങളുടെ പ്രദർശനവും വിൽപ്പനക്കാരും വാങ്ങുന്നവരും തമ്മിലുള്ള കൂടിക്കാഴ്ചയും (Buyer-Seller Meet) സംഘടിപ്പിച്ചു.

ജൂലൈ 24, 2025 വ്യാഴാഴ്ച KCCI പരിസരത്ത് വെച്ച് നടന്ന പരിപാടി, കുവൈറ്റും ഇന്ത്യയും തമ്മിലുള്ള സാമ്പത്തിക സഹകരണം ശക്തിപ്പെടുത്തുന്നതിനും പുതിയ വ്യാപാര അവസരങ്ങൾ തുറക്കുന്നതിനുമുള്ള ഒരു സുവർണ്ണാവസരമായി വിലയിരുത്തപ്പെട്ടു. ഇന്ത്യയിൽ നിന്നുള്ള പ്രമുഖ മാമ്പഴ കയറ്റുമതിക്കാരും മറ്റ് കാർഷിക ഉൽപ്പന്നങ്ങളുടെ പ്രതിനിധികളും പരിപാടിയിൽ പങ്കെടുത്തു.കുവൈറ്റിലെ ഇന്ത്യൻ സ്ഥാനപതി ഡോ. ആദർശ് സ്വൈക, KCCI ഭാരവാഹികളുടെയും മറ്റ് പ്രമുഖരുടെയും സാന്നിധ്യത്തിൽ പരിപാടി ഉദ്ഘാടനം ചെയ്തു.

ഇരു രാജ്യങ്ങളും തമ്മിലുള്ള സഹകരണം വർദ്ധിപ്പിക്കുക എന്ന ലക്ഷ്യത്തോടെ ഇന്ത്യൻ എംബസി സംഘടിപ്പിക്കുന്ന “വ്യാപാരം, സാങ്കേതികവിദ്യ, വിനോദസഞ്ചാരം” (3Ts) എന്ന പ്രചാരണ പരിപാടിയുടെ ഭാഗമാണ് ഈ പ്രദർശനം.2023-24 സാമ്പത്തിക വർഷത്തിൽ ഇന്ത്യയിൽ നിന്ന് കുവൈറ്റിലേക്കുള്ള ഭക്ഷ്യ-കാർഷിക ഉൽപ്പന്നങ്ങളുടെ കയറ്റുമതി ഏകദേശം 350 മില്യൺ ഡോളറായിരുന്നു.

ഇതിൻ്റെ ഭാഗമായി, ലുലു ഹൈപ്പർമാർക്കറ്റിൻ്റെ അൽറായി ഔട്ട്‌ലെറ്റിൽ ഇന്ത്യൻ മാമ്പഴ മഹോത്സവത്തിനും തുടക്കം കുറിച്ചു. ജൂലൈ 23-ന് ഇന്ത്യൻ സ്ഥാനപതി ഡോ. ആദർശ് സ്വൈകയാണ് ഫെസ്റ്റിവൽ ഉദ്ഘാടനം ചെയ്തത്. അമ്രപാലി, ഫസ്ലി, മല്ലിക, ലംഗ്ര, ചൗസ, ദശേരി തുടങ്ങിയ ആറ് പ്രീമിയം ഇനം മാമ്പഴങ്ങൾ മേളയിൽ ഒരുക്കിയിട്ടുണ്ട്.മാമ്പഴ കേക്കുകൾ, പേസ്ട്രികൾ, പരമ്പരാഗത ഇന്ത്യൻ മധുരപലഹാരങ്ങൾ, ജ്യൂസുകൾ, അച്ചാറുകൾ എന്നിവയുൾപ്പെടെ മാമ്പഴം അടിസ്ഥാനമാക്കിയുള്ള വിവിധ ഉൽപ്പന്നങ്ങളും ഉപഭോക്താക്കൾക്കായി ഇവിടെ ലഭ്യമാണ്.ഇന്ത്യൻ കാർഷിക കയറ്റുമതി പ്രോത്സാഹിപ്പിക്കുകയും ഇന്ത്യ-കുവൈറ്റ് വ്യാപാര ബന്ധം ശക്തിപ്പെടുത്തുകയും ചെയ്യുക എന്നതാണ് ഈ പ്രൊമോഷനിലൂടെ ലക്ഷ്യമിടുന്നത്.