കുവൈറ്റിൽ ഇതുവരെ ഒമൈക്രോൺ കേസുകൾ റിപ്പോർട്ട് ചെയ്തിട്ടില്ലെന്ന് ആരോഗ്യമന്ത്രി

Times of Kuwait

കുവൈറ്റ് സിറ്റി: ഒമൈക്രോൺ വൈറസ് പല രാജ്യങ്ങളിലും പടർന്നിട്ടുണ്ടെങ്കിലും കുവൈറ്റിൽ വൈറസ് ബാധ റിപ്പോർട്ട് ചെയ്തിട്ടില്ലെന്ന് ആരോഗ്യമന്ത്രി ഷെയ്ഖ് ഡോ. ബാസൽ അൽ-സബാഹ് പറഞ്ഞു. ഈ വകഭേദം ഉണ്ടാകുന്നതിന് മുമ്പ് തന്നെ രോഗ പ്രതിരോധത്തിൽ മന്ത്രാലയത്തിന്റെ നടപടിക്രമങ്ങൾ അസാധാരണമായിരുന്നുവെന്ന് ഷെയ്ഖ് ഡോ. ബാസൽ അൽ-സബാഹ് സ്ഥിരീകരിച്ചു.

കുവൈറ്റിൽ ഏർപ്പെടുത്തിയിട്ടുള്ള ആരോഗ്യ നിയന്ത്രണങ്ങളും നടപടിക്രമങ്ങളും ഈ വൈറസ് പൗരന്മാർക്കും താമസക്കാർക്കും ഇടയിൽ പടരുന്നത് തടഞ്ഞു എന്നും മന്ത്രി അഭിപ്രായപ്പെട്ടു. “അടച്ച സ്ഥലങ്ങളിൽ മാസ്ക് ധരിക്കാനും വാക്സിനേഷൻ എടുക്കാനും മൂന്നാമത്തെ ബൂസ്റ്റർ ഡോസ് എടുക്കാനും പിസിആർ ടെസ്റ്റുകൾ നടത്താനും ഞങ്ങൾ എല്ലാ ആളുകളോടും അഭ്യർത്ഥിക്കുന്നു,” അദ്ദേഹം ഊന്നിപ്പറഞ്ഞു. രാജ്യത്ത് വാക്സിനേഷൻ നിരക്ക് മികച്ചതാണെങ്കിലും, പുതിയ വൈറസ് രാജ്യത്ത് പടരുകയാണെങ്കിൽ കേസുകളുടെ എണ്ണം വർദ്ധിക്കുമെന്നും അതിനാലാണ് “നാം ആളുകൾക്കും സമൂഹത്തിനും ഇടയിൽ സംരക്ഷണ നിലവാരം വർദ്ധിപ്പിക്കേണ്ടതുണ്ടെന്നും അദ്ദേഹം കൂട്ടിച്ചേർത്തു.